නිදහස් අධ්‍යාපන අයිතීන් සියලු දරුවන් වෙනුවෙන් සුරක්ෂිත කරනවා

අධ්‍යාපනයේ විෂමතා දුරු කර නිදහස් අධ්‍යාපනයේ අයිතීන් සියලු දරුවන් වෙනුවෙන් සුරක්ෂිත කිරීම නව රජයේ අරමුණ බව නුගේගොඩ සමුද්‍රදේවි බාලිකා විද්‍යාලයේ වාර්ෂික ත්‍යාග ප‍්‍රදානෝත්සවයට ඊයේ (28) පස්වරුවේ එක් වෙමින් ජනාධිපතිතුමා ප්‍රකාශ කළේය.

නිදහස් අධ්‍යාපනයේ යහපත් ප‍්‍රතිඵල රටේ සියලූ දරුවන්ට ලබාදීම සැමගේ වගකීමක් වන අතරම ඊට අවශ්‍ය සම්පත් ලබාදෙමින් රජය කටයුතු කරත්දි දරුවන් ඊට උනන්දු කිරීම දෙමාපියන්ගේ වගකීමක් බවද ජනාධිපතිතුමා කියා සිටියේය.

රටේ පළාත් 09ම ජීවත්වන ජනතාවගේ සාක්ෂරතාවය එක ලෙස ඉහළ නැංවීම රජයේ අරමුණ බවද පැවසූ ජනාධිපතිතුමා ඉදිරි අධ්‍යාපන සැලසුම් තුළ රටේ සමස්ත ජනතාවගේ සාක්ෂරතාවය 100‍%  දක්වා ඉහළ නැංවීමට අපේක්ෂා කරන බවද කියා සිටියේය.

නුගේගොඩ සමුද්‍රදේවි බාලිකා විද්‍යාලයේ 2014 වර්ෂයේ විශිෂ්ටතා දැක්වූ සිසුවියන්ට සම්මාන හා තිළිණ ප‍්‍රදානය කිරීම මෙහිදී ජනාධිපතිතුමා අතින් සිදු කෙරුණු අතර විද්‍යාලයේ සෞන්දර්ය ඒකකය සිසු අයිතියට පැවරුණේද ජනාධිපතිතුමා අතිනි.

අමාත්‍ය සුසිල් ප්‍රේමජයන්ත, බස්නාහිර පළාත් ප‍්‍රධාන අමාත්‍ය ඉසුරු දේවප්‍රිය, පළාත් අමාත්‍ය ගාමිණි තිලකසිරි යන මහත්වරුන් ඇතුළු ආරාධිත පිරිසක්ද, විද්‍යාලයේ විදුහල්පතිනිය, ආචාර්ය මණ්ඩලය, දෙමව්පියන්, ආදි සිසුන් ඇතුළු පිරිසක් මෙම අවස්ථාවට එක්ව සිටියහ