රටක අනාගතය උගත්කමයි

රටක අනාගතය සම්පූර්ණයෙන්ම රඳා පවතින්නේ ඒ රටේ ජනතාවගේ දැන උගත්කම මත බවත් නිදහස් අධ්‍යාපන ප‍්‍රතිපත්තිය හා දර්ශනය නව තාක්ෂණික ලෝකය හා බද්ධ කරමින් නව මුහුණුවරකින් ඉදිරියට ගෙන යාමේ අවශ්‍යතාවය ඇති බවත් ජනපති මෛත්‍රිපාල සිරිසේන මහතා  (2) ඌව වෙල්ලස්ස විශ්ව විද්‍යාලයේ උපාධි ප්‍රදානෝත්සවයට එක්වෙමින් පැවසීය.
‘අද උපාධිධාරීන් විදියට ඔබ ලබන මේ විශිෂ්ට සහතිකයත් සමග ඔබේ ජීවිතයේ බලාපොරොත්තු රාශියක් තිබෙනවා. ඒ බලාපොරොත්තු තම ජීවිතය සමත් වීම පිළිබඳවයි. විභාග වලින් ලබන සහතිකය අපි ජීවිතය සමත් කරගැනීම සඳහා කොතෙක් දුරට උපයෝගි කරගන්නවාද, අධ්‍යාපන සහතිකයෙන් ලබා ඇති දැනුම ප‍්‍රායෝගික සමාජය තුළ තිබෙන්නා වූ විවිධ ගැටලූකාරී තත්වයන් මෙන්ම අභියෝගයන් සමග සාර්ථක ජීවිතයක් ගොඩනගන්න කළයුතු කාර්යයන් අප විසින් ඉටුකළ යුතු වෙනවා. ඒ කැපවීම ඔබට ලැබී ඇතැයි මම විශ්වාස කරනවා. ඒ කැපවීම රට ගොඩනගන්න, ඉදිරියට ගෙනයන්න මුළු මහත් මානව ප‍්‍රජාවගේ අනාගතය සඳහා උපයෝගි කරගැනීමේ අවශ්‍යතාවය පවතිනවා. පොත පතින් ලබන දැනුම සමාජයේදී අපි ප‍්‍රායෝගිකව භාවිතා කරන්නේ කෙසේද යන්න පිළිබඳව සිතිය යුතුයි. දේශන ශාලා තුළ, පුස්තකාල තුළ, විද්‍යාගාරයක් තුළ, අපි ලබන දැනුම ප‍්‍රායෝගික සමාජයේ දී භාවිතා කරමින් රට දියුණු කළ යුතුයි. පසුගිය දින වල ජී 7 සමුළුවට මා ජපානයට ගිය අවස්ථාවේදී ජපානයේ අධ්‍යාපන කටයුතු පිළිබඳව මා විමසා බැලූවා. අපේ රටේ සමාන්‍ය පෙළ, උසස් පෙළ දක්වා තිබෙන ශ්‍රේණි වල තත්වයට ජපානයේ නිදහස් අධ්‍යාපනය ලබා දෙනවා. නමුත් විශ්වවිද්‍යාලයට ඇතුළත් වන තරුණ දරුවෙක් ඒ විශ්වවිද්‍යාල අධ්‍යාපනයට ඇතුළත් වන අවස්ථාවේ සිට ඉන් පිටවෙන තෙක් උපාධිය ලබා ගැනීමට අති විශාල මුදලක් ගෙවීමට සිදු වෙනවා. චීනය වැනි රටක් ගත්විට විශ්වවිද්‍යාලයට ඇතුළත් වන තරුණ දරුවෙක් තමාගේ අධ්‍යාපනික කටයුතු සඳහා අති විශාල මුදලක් වැය කළ යුතු වෙනවා‘ යැයිද ජනපති කීවේය.

i